சாலை விதிகளே வாழ்விற்கு வழிகாட்டி

#விதிகளே

தலைவிதிகளாய்

மாறாமல் இருப்பதற்கே

சாலை விதிகள்.

#கட்டுபாடுகள்

கசக்கத்தான் செய்கிறது

அதனாலென்ன

நினைத்து பாருங்கள்

உங்கள் வாழ்வு இனிக்குமே.

#வேகத்தினால் இன்பம்

அக்கணம் மட்டுமே.

சாலை விதிகளை

மதித்தால் இன்பம்

வாழ்நாள் உள்ள வரையுமே.

#தலை விதிகளை மாற்றியெழுத

விரைந்து செல்லாதீர்கள்

சாலை விதிகளை புறக்கணித்து.

#விபத்தில் மரணத்தின் வலி

ஒரு நொடி என்றாலும்,

வாழ்வின் முழு இன்பமும்

முடிந்து விடும் அந்த நொடியிலே.

#சாலை விதிகளை மீறி

எமனாகவும் மாறாதீர்கள்

எமனுக்கு

இரையாகவும் ஆகாதீர்கள்.

#பெற்றெடுப்பதற்கு பத்து மாதம்

வளர்ந்து நிற்பதற்கு இத்தனை காலம்.

ஒரு நொடியில் மாற்றி விடாதீர்கள்

சாலை விதிகளை மீறி.

#சாலை விதியை நீங்கள் மீறி

அடுத்தவர் தலைவிதியை

மாற்றி விடாதீர்.

#ஒரு வழி பாதையை

நீங்களாக இரு வழியாக்கினால்,

ஒரு வழியாகவே போய் விடுவீர்

திரும்ப முடியாமல்.

#சாலை விதிகளை மிதித்து செல்லாதீர்

என்றேனும் ஒரு நாள், நீங்கள்

சாலையில் நசுங்கிட நேரிடலாம்.

#சுற்றி வர நேரமென்று

குறுக்கு வழி தேடினால்?

சமயத்தில் குறுகிவிடும்

உங்கள் வாழ்வின் நேரமும்

#உங்களை

அடிமை படுத்த அல்ல சாலைவிதிகள்

பயணம் இனிமையாய் முடிந்து

வாழ்வு அமைதியாய் செல்ல

#வாகனத்தில் மகிழ்வுடன் செல்லுங்கள்

அமரர் வாகனத்தில் அல்ல.

#பொறுப்பு வேண்டும்

சாலைவிதிகளை கடைப்பிடிப்பதில்

பொறுமை வேண்டும்

சாலையில் பயணிப்பதில்

#பொறுமையின்றி முந்த வேண்டாம்

பொல்லா நாசம் அடைய வேண்டாம்.

#யோசித்து செயல்படுகிறோம்

வாழ்வின் மேடுபள்ளங்களை கடக்க,

சாலை மேடுபள்ளங்களை கடக்க

சாலைவிதிகளை கடைப்பிடியுங்கள்.

#2006ல் சாலைவிதிகளின் விழிப்புணர்வு பிரச்சாரத்திற்காக எழுதியது.